AUTOEROTISMOA

Gaur egun jada masturbazioak inolako gaitz fisikorik edo mentalik eragiten ez duela
nahiko zabalduta dago. Inork ez du zalantzan jartzen gaixotasunik sortzen ez duela
(irakasleak, aita edo ama kontserbadoreak ez dituzte horrelakoak esaten: “itsu
geldituko zara”, “bizkarrezur-muina lehortuko zaizu” edo “zoratu egingo zara”). Gure
gorputza ezagutzeko ona izan daitekeela esaten digute orain, zer atsegin dugun
jakiteko, urduri gaudenean lasaitzeko edo gure bikotearekin dugun harremana
hobetzeko, zer atsegin dugun edo zer ez hobeto azal baitiezaiokegu. Azken batean,
gauza askotarako balio duela eta praktikatzeko nahikoa arrazoi badugula.
Hala ere, badirudi adin jakin bat izan arte egokia izateaz gain, masturbatzea
derrigorrezkoa ere badela, plazera sentitzeko eta gure gorputza ezagutzeko bakarkako
moduak bilatzeko. Badirudi zenbat eta gehiago egin (edo zenbat eta gehiago esan),
orduan eta hobe dela.
Hala ere, gai honek oraindik kezkatu egiten gaitu. Zergatik? Batzuetan gaizki jokatzen
dugula pentsatzen dugulako. Bikotea dugunean, jada helduak garenean, askotan
egiten dugunean… Bikotea dugunean masturbatzea beharrezkoa izan beharko ez
litzatekeela pentsatzen dugu eta adinean aurrera goazenean eta gure hormonak
horren nahastuta ez daudenean, gure eszitazioa kontrolatu egin beharko genukeela
eta beste pertsona batzuekin ditugun harremanetara zuzendu beharko genukeela
pentsa dezakegu. Edo gehiegitan masturbatzen garela pentsa dezakegu, horren neska
lagun edo mutil lagun jatorra izanda eta berarekin ohean horren ondo pasatuta
normala ez dela pentsa dezakegu, sexu-adikzioa izan dezakegula.
Arazoa hauxe da: masturbazioari buruzko garai bateko aurreiritziak gainditu nahian,
helburuak jarri dizkiogu. Eta horiek betetzen ez direnean kezkatu egiten gara. Gure
gorputzak kitzikapen ugari sentitzeko gaitasuna duela esan beharko genuke, kitzikapen
atseginak eta desatseginak, eta horietatik atsegin ditugunak bilatzen saiatzen garela.
Pertsona guztiei ezin zaizkie gauza berberak gustatu eta, horregatik, ezin diogu inori
esan nola, noiz edo zergatik ukitu behar duen bere gorputza.
Baina esaten ari naizen hau gizonezkoen masturbazioarekin lotuta pentsatzen edo
esaten du jendeak. Izan ere, oraindik orain gizonen nahiz emakumeen sexualitatea ez
Centro Sexológico EMAIZE Sexologia Zentroa 2
baita berdin ikusten: emakumeen masturbazioa tabu da oraindik. Neskek ez dugu gure
plazerari buruz hitz egiten, pertsona batenganako edo beste batenganako sentitzen
dugun desioari buruz (batez ere erakartzen gaituena beste emakume bat baldin bada).
Emakume askok eta askok, edozein adinetakoak izanda ere, ez dituzte beren sexuorganoak
ezagutzen. Nola ezagutuko dituzte, bada, mutilek, emakume horiekin izaten
dituzten lehenengo harremanetan? Ba al dakizu zure kanpoaldeko organo genitalen
izenak? Ez potxin, ez ematutu eta ez... Beste edozein izen jartzen diogu, benetakoa
izan ezik: alua. Benetako izena ez ezagutzeaz gain, dituen zatiak, ezaugarriak eta
funtzioak ere ez ditugu ezagutzen.
Baina, nola masturbatzen gara neskak? Emakume guztiak ez gara berdinak eta,
horregatik, ez gara guztiak berdin masturbatzen. Gainera, ez daukagu zertan guztiak
masturbatu. Gaur egun mutilek maginatik zerbait sartuz masturbatzen garela
imajinatzen dute (oraingoan magina terminoa ondo erabili dugu), hori plazeraren gunea
balitz bezala. Film pornoetan hori ageri da, autoerotismorako zakila ordezkatzen duen
zerbait beharko bagenu bezala.
Bada, mutilok, hori ez da horrela; gure aluan (maginaren sarreratik urrun samar) klitoria
dago: nerbio-bukaera ugariz osatuta dago, zakilaren glandea bezalaxe. Klitoriaren
funtzio bakarra sentipen sakonak sentiaraztea da (plazera, baina baita mina ere,
kitzikatzeko moduaren arabera). Beraz, sentikortasun handiko gunea da, ziurrenik
gorputz osoko sentikorrena, eta neska askok, masturbatzerakoan, puntu hori
ferekatzen dute.
Mutil guztiak ere ez dira modu berean masturbatzen, baina demagun horrela dela. Izan
ere, mutilen nahiz nesken gorputzetan, genitaletan sentikortasuna handia den arren,
badira sentikorrak diren beste gune batzuk ere: gorputz osoak erantzun egiten du
ferekatzen dugunean eta plazera eskaintzen digu. Garrantzitsuena, neska edo mutila
izan, ez da zenbat aldiz masturbatzen zaren, baizik eta masturbazioaren kalitatea,
masturbatzeko modu desberdinak.
Plazera sentitzeko gure gorputza ukitzea ondo sentitzeko modu bat izan daiteke, baina
ez da derrigorrezkoa edo bakarra, eta ez dugu modu jakin batean egin behar. Pertsona
bakoitzari dagokio zer atsegin duen eta zer ez aurkitzea eta, hori jakinda, zer egin nahi
duen eta zer ez erabakitzea. Kontu hauetan ez dago araurik eta, beraz, zure esku
dago zure gorputzak transmititzen dizkizun sentipenak zein diren aurkitzea.

SEXUALITATEA GAZTEEK GUTXI EZAGUTZEN DUTEN GAI BAT DA ORAINDIK, LOTSA HANDIA DAGO.

Catherine Hiriart- Sorano
Camus ikastetxeko erizaina
Catherine Hiriart Sorano erizaina da Baionako Santa Gurutze auzoko Camus ikastetxean. Hamahiru urte daramazki bertan, eta urtero hamahiru-hamalau urte inguruko gazteei sexualitateari buruzko informazio klaseak eskaintzen dizkie.

Zer-nolako lana daramazu sexualitatearen arloan?
Arlo horretan, Camus ikastetxean eskaera txikia da, baina sexualitateari dagokion osasun heziketarako ekintza berezi bat bideratzen dugu, halere. Duela hamar urte abiatu genuen hori, eta hamahiru urteko gazteekin, gelaka, urtean lau ordu hartzen ditugu sentsibilizazio lana egiteko. Informazio hori ezinbestekoa da.
Derrigorrezkoa den informazio lan bat dela esan duzu. Zergatik?
Argi agertzen da ezagupen eskasia dagoela. Kanpotik begiratzen dugularik, komunikabideen bidez gazteek informazio handia jasotzen dutela iruditzen zaigu, baina, ez da hala, gutxi ezagutzen duten gai bat da oraindik. Askok aurreiritzi asko du eta, gutxi jorratzen den gaia dela uste dugu. Gurasoekin gutxi aipatzen dute, eta lotsa handia dagoela ikusten dugu.
Zertan datza heziketa lan hori?
Lehen gauza galdeketa anonimoa egitea da. Hori oso klasikoa izaten da, esate baterako, emakumeen eta gizonezkoen organo genitalak kokatzeko eskatzen diet. Gutxieneko ezagupen horretan ere gabezia handia dagoela ikusten da. Askok ez dakizkite kokatzen, eta, neskek izaten dute ezagupen murritzena. Elkartze horietan argi agertzen da informazio beharra dagoela. Sexu harremanaz beldur dira. Hainbat gai aipatzen ditugu, koitoa, kontrazepzioa, sexu harremana eta beste. Ondotik, gaika lan egiten dugu. Iaz, adibidez, gizon edo emazteak bikoteaz zer itxaroten duten galdetu nien, eta horretan ere, elkar ezagutza eskasa zegoen. Ikusi behar da gazteak direla oraindik. Estatu frantsesean lehen sexu harremana, batez beste, 17 urterekin izaten da. Halere, badira gazteago hasten direnak, eta, lehen harreman hori izaterakoan denbora hartzea eta errespetua garrantzitsuak direla esaten diegu.
Internetek edo telebistak ez al du eraginik sexu harremanari buruz duten ikuspegian?
Pixka bat nahasiak dira. Film pornografikoak ikusten dituzte. Baina, halere, gehienek ezberdintasuna egiten dute.
Informazioaren garrantzia aipatzen duzu. Planning Familial elkartea sortuko da. Nola ikusten duzu sorrera hori, zertan izango zaizue lagungarri?
Bilkura bat izan dugu beraiekin. Informazioa zabaltzeko ez gara asko. Gu ikastetxeetan ari gara, ospitalean Planifikazio Zentroa dago. Ezinbestekoa da informazioa zabaltzea. Eta, kasu honetan, Planning Familial Baiona erdigunean kokatua izatea oso berri ona da. Hutsune anitz dago informazioa zabaltzeko arloan. Dakigularik Baionako erietxean, urtean, seiehun bat abortu egiten direla, eta horietarik ehun bat adin txikiko neskak direla, argi dago lana dagoela egiteko. Kopuruak bere horretan jarraitzen du azken urteotan. Lan horretan gero eta gehiago izanda, hobeki izango da gaztentzat, baina, helduentzat ere bai, informazioa gizarte eremu guztietara zabaldu behar baita.

ZERGATIK KOSTATZEN ZAIE GURASOI BERAIEN SEME-ALABEKIN SEXUALITATEAZ HITZ EGITEA?

Orokorrean, seme-alabekin, horiek nerabeak direnean, edozein gairi buruz hitz egitea asko kostatzen zaie gurasoei. Garai horretan, gurasoengandik aldentzeko joera dute semealabek; bestalde, ziurtasun-gabezia handia eta gurasoen premia izaten dute. Horregatik, ohikoa da nerabeek sexualitateari buruzko informazioa etxetik kanpo bilatzea. Gurasoek seme-alabak sexudun pertsona gisa ikusteko duten zailtasuna batzen zaio lehen aipatutakoari, seme-alabak haur izaten jarraitzea nahi izaten baitute. Gainera, gerta liteke seme-alaben sexualitateak gurasoei beraien bizitza sexualean izandako egoerak berriz ere gogoraraztea, edo gai horren inguruan seme-alaben aurrean ezjakin agertzeko beldurra sentitzea.